“Sağlam qida, çox hadisələrə əsəbləşməmək və idmanla məşğul olmaq infarkt, insult və digər xəstəliklərin qarşısını almağa kömək edir”.

Aztibb.az iz.ru-ya istinadən xəbər verir ki, bunu almaniyalı alim və həkim Ditrix Qrenemeyer “FOCUS” nəşrinə verdiyi müsahibədə deyib.

“Kiçik qan lövhələri iltihablı toxumaya yapışdıqda və yağ yığdıqda arteriyalar tıxanır. Qan damarlarının tıxanması ateroskleroza səbəb olur. Gələcəkdə bu proses infarkt, insult və ya digər xəstəliklərlə nəticələnir. Bunun baş verməməsi üçün davamlı, hər gün azı bir saat idman edilməlidir”, - deyə alim bildirib.

Alman həkim qeyd edib ki, sağlam pəhriz də profilaktik tədbirdir: “Şəkər və spirtin qəbulu da minimuma endirilməlidir. Bunun əvəzinə tərəvəz və az yağlı qidalar qəbul edilməlidir”.

Onun sözlərinə görə, üçüncü məqam stressdən uzaq olmaqdır. Belə ki, stressə düşəndə qan təzyiqi qalxır, ürək daha sürətli döyünməyə başlayır və əzələlərdə dartınma əmələ gəlir. Stressin təsirindən isə orqanizmdə qan dövranı zəifləyir, damarlarda tromblaşma əmələ gəlir və hətta bəzən bu narahatılıqlar infarktla da nəticələnir.