"Jenşen, eleuterokokk, exinaseya,  aloe  (əzvay), kalanxoe,  estraqon,  çaqa və s. ən məşhur bitki immunomodulyatorlarıdır".

AMEA Botanika İnstitutunun Etnobotanika laboratoriyasının müdiri, biologiya elmləri doktoru, professor Səyyarə İbadullayeva Aztibb.az-a müsahibəsində bu məlumatı verib. O, payız-qış aylarında immun müalicəsinə (həm bitki, həm də kimyəvi dərmanlarla) daha çox ehtiyac hiss edildiyini deyib: “Bunu düşünərək biz, ilk dəfə olaraq exinaçeyanın yerüstü hissəsi, dazı otu, biyan kökü, itburnu meyvəsi, zəncəfil kökü, rozmarin otu və kasnı kökündən ibarət, 1:1 nisbətində  immunbərpaedici  fitoçayı hazırlamışıq. Qarışımın tablet, kapsul, paket-çay və 1:2 nisbətində şəkər əlavə edilməklə sirop şəklində istehsalı üçün Avro-Asiya patenti alınıb”.

S.İbadullayeva bu çayın orqanizmin qoruyucu gücünü artırmaq, kompleks soyuqdəymə, qrip, bronxit, angina, pnevmoniya, bronxial astma və infeksiyaları tez sağaltmaq kimi unikal təsirə malik olduğunu diqqətə çatdırıb. Əlavə edib ki, xüsusilə xoş olmayan klimatik və ekoloji şəraitdə yaşayanlar immun sistemini bərpa etmək və qorumaq məqsədilə bu qarışımdan dərman vasitəsi kimi istifadə edə bilərlər.