Azərbaycan Tibb Universitetinin (ATU) Elmi tədqiqatların idarə olunması departamenti, Data-analitika və süni intellekt laboratoriyası və Dünya Azərbaycanlı Alimlər Dərnəyinin (DAAD) birgə təşkilatçılığı ilə “Tibbi datanın istifadəsi” mövzusunda 9 vebinardan ibarət təlim proqramının ilk tədbiri keçirilib.
ATU-dan Aztibb.az-a verilən xəbərə görə, “Tibbi məlumatlara və real klinik praktikadan əldə edilən sübutlara giriş” mövzusuna həsr olunan vebinar iştirakçıları tibbi məlumatların elmi tədqiqatlarda istifadəsi, real klinik praktikadan əldə edilən məlumatların təhlili və sübuta əsaslanan tibbdə tətbiqi imkanları ilə tanış etmək məqsədi daşıyıb.
Tədbirdı çıxış edən ATU-nun Elmi tədqiqatların idarə olunması departamentinin rəhbəri, professor Eldar Qarayev müasir tibbi tədqiqatlarda rəqəmsal texnologiyaların və məlumatların təhlilinin artan rolunu vurğulayıb. O, universitetdə elmi tədqiqatların keyfiyyətinin yüksəldilməsinin, beynəlxalq elmi əməkdaşlığın genişləndirilməsinin və gənc tədqiqatçıların müasir metodoloji biliklərə yiyələnməsinin əsas prioritetlərdən olduğunu qeyd edib.
Vebinarda beynəlxalq təcrübəyə malik mütəxəssislər — Avstraliya Təcili Tibbi Yardım Kollecinin (ACEM) Klinik Keyfiyyət Reyestrinin İnkişafı üzrə rəhbəri, La Trobe və Deakin universitetlərinin akademik əməkdaşı Abraham Alvandi və Fransada Oracle şirkətinin tibbi data layihələri meneceri Reyhan Həsənova məruzələrlə çıxış ediblər. Məruzələr zamanı tibbi məlumatların əsas növləri, onların toplanması, təhlili və elmi tədqiqatlarda istifadəsi, real klinik praktikadan əldə edilən sübutların (əhəmiyyəti, eləcə də rəqəmsal səhiyyənin inkişaf perspektivləri barədə məlumat verilib.
ATU-nun Data-analitika və süni intellekt laboratoriyasının müdiri, dosent İsmayıl Qafarov çıxışında tibbi məlumatların sistemli şəkildə toplanması, emalı və təhlilinin müasir elmi tədqiqatlarda mühüm əhəmiyyət daşıdığını bildirib.
Qeyd edək ki, “Tibbi datanın istifadəsi” təlim proqramının əsas məqsədi tibbi məlumatların elmi tədqiqatlarda səmərəli istifadəsini təşviq etmək, tədqiqatçıların rəqəmsal və analitik bacarıqlarını inkişaf etdirmək, eləcə də beynəlxalq elmi əməkdaşlıq üçün yeni imkanlar yaratmaqdır.

