Səhiyyə Nazirliyi Ə.Əliyev adına Sumqayıt Tibb Kollecində “Uşaq Hüquqları Aylığı” çərçivəsində “Uşaqların sağlamlıq hüququ: peyvəndləmə, immunoprofilaktika və elmi həqiqətlər” mövzusunda elmi-praktik seminar keçirilib.

 

Sumqayıt Tibb Mərkəzindən Aztibb.az-a bildirilib ki, seminarda mərkəzin direktor müavini, İlkin səhiyyə xidmətinin rəhbəri Namirə Abbasova iştirak edərək ilkin səhiyyə xidmətinin təşkili və uşaqların sağlamlığının qorunmasında profilaktik tədbirlərin əhəmiyyəti barədə çıxış edib.

 

Sumqayıt Tibb Mərkəzinin 4 nömrəli Ailə Sağlamlıq Mərkəzinin ailə həkimi-pediatrı Nərmin Əmirova peyvəndləmənin əhəmiyyəti, uşaqların immunoprofilaktikası, peyvəndlərin yoluxucu xəstəliklərdən qorunmadakı rolu haqqında ətraflı məlumat verib.

 

Kollecin müəllimi Aynurə Kazımova uşaqların hüquqlarının müdafiəsi, sağlamlıq hüququnun qanunvericilikdə təsbit olunması və bu hüququn təmin edilməsinin vacibliyi barədə məruzə ilə çıxış edib.

 

Seminar çərçivəsində kollecin tələbəsi Türkanə Əhmədzadə sosial şəbəkələrdə peyvəndlərlə bağlı yayılan yanlış məlumatlar və miflər mövzusunda təqdimatla çıxış edib. Təqdimatda elmi faktlara əsaslanmağın, düzgün məlumat mənbələrindən istifadə etməyin və yanlış informasiyanın yayılmasının qarşısının alınmasının əhəmiyyəti vurğulanıb.

 

Tədbir mövzu ətrafında fikir mübadiləsi və müzakirələrlə davam edib.