Alimlər orqanizmin adi hüceyrələrini (induksiya olunmuş pluripotent kök hüceyrələri – iPS-hüceyrələr) yenidən proqramlaşdıraraq dopamin istehsal edən neyronlara çevirməyi öyrəniblər. Məhz bu neyronlar Parkinson xəstəliyi zamanı tədricən məhv olur.

Aztibb.az "Medvestnik"ə istinadən yazır ki, klinik sınaqlar çərçivəsində hüceyrə transplantasiyası artıq ilk pasiyentlərə tətbiq edilib. Sınaqlarda iştirak edən 7 nəfərdən 4-də ciddi əlavə təsirlər müşahidə edilmədən vəziyyətin nəzərəçarpacaq dərəcədə yaxşılaşdığı qeydə alınıb.

Bu, nə üçün əhəmiyyətlidir?

Bu yanaşmanın əsas üstünlüyü ondan ibarətdir ki, məqsəd yalnız dərman vasitəsilə xəstəliyin əlamətlərini nəzarətdə saxlamaq deyil, beynin zədələnmiş nahiyələrində itirilmiş hüceyrələrin funksiyasını yeni, sağlam hüceyrələr vasitəsilə bərpa etməyə çalışmaqdır.

Texnologiya Yaponiyada şərti təsdiq alıb. Bununla belə, tədqiqatlar hələ ilkin mərhələdədir və müalicənin uzunmüddətli nəticələrinin, eləcə də təhlükəsizliyinin qiymətləndirilməsi üçün əlavə müşahidələrə ehtiyac var.