Antalyada keçirilən Uroloji Cərrahiyyə Konqresində tibb və texnologiyanın imkanlarını nümayiş etdirən qeyri-adi hadisə baş verib. Çinli həkim Jun Yang konqres zalında quraşdırılmış robotik cərrahiyyə sistemi vasitəsilə 7168 kilometr uzaqlıqda – Çində yerləşən xəstənin prostat xərçəngi əməliyyatını uğurla həyata keçirib.

Aztibb.az "China Daily" agentliyinə istindaən xəbər verir ki, yüksək sürətli internet bağlantısı və qabaqcıl robot texnologiyası sayəsində həkim əməliyyatı Antalyadan canlı şəkildə idarə edib. Konqres iştirakçıları isə bu prosesi zalda quraşdırılmış ekranlar vasitəsilə real vaxt rejimində izləyiblər.

Uzaq məsafədən idarə olunan robotik sistem cərraha xəstənin olduğu məkanda fiziki olaraq iştirak etmədən mürəkkəb cərrahi müdaxiləni həyata keçirmək imkanı verib. Əməliyyatın uğurla başa çatması tibbdə məsafədən robotik cərrahiyyənin inkişafı baxımından diqqətçəkən hadisə kimi qiymətləndirilir.

Bu hadisə müasir tibbin rəqəmsal texnologiyalarla inteqrasiyasının hansı səviyyəyə çatdığını bir daha nümayiş etdirib. Robotik cərrahiyyə gələcəkdə coğrafi məsafələrin həkim və pasiyent arasında yaratdığı maneələri azaltmaqla, ixtisaslaşmış tibbi xidmətlərə çıxış imkanlarının genişlənməsinə töhfə verə bilər.