“Scientific Reports” jurnalında dərc edilən yeni tədqiqat zamanı oyaq ikən zehində heç bir vizual görüntü canlandıra bilməyən (afantaziya) insanların yuxu dünyası araşdırılıb. Məlum olub ki, bu vəziyyətdən əziyyət çəkən insanların yuxu görmə təcrübələri insanlardan asılı olaraq fərqlənir.

Bu barədə Aztibb.az https://www.sciencealert.com-a istinadla xəbər verir.

Araşdırma zamanı afantaziyası olan iştirakçıların 46 faizi yuxularında hər zaman təsvir gördüklərini, təxminən 8 faizi isə heç vaxt vizual obrazla qarşılaşmadığını bildirib. Bununla yanaşı, yuxularında mütəmadi olaraq səs və söhbətlər eşidən şəxslərin gündəlik həyatda da zehnində səs xəyalları qurmağa və daxili danışıqlara daha çox meyilli olduğu müəyyən edilib. Alimlər oyaq ikən əlçatmaz olan bu görüntülərin yuxuda necə yaranmasının hələlik tam aydın olmadığını, prosesin beynin müvafiq bölgələrinin qarşılıqlı əlaqəsi ilə bağlı ola biləcəyini qeyd edirlər.