Zaqatala Rayon Mərkəzi Xəstəxanasında strangulyasion nazik bağırsaq keçməzliyinin aradan qaldırılması məqsədilə təcili laparoskopik əməliyyat uğurla həyata keçirilib.

Aztibb.az xəbər verir ki, qarında kəskin ağrı şikayəti ilə xəstəxanaya müraciət edən pasiyent müvafiq müayinələrdən keçirilib və ona strangulyasion nazik bağırsaq keçməzliyi diaqnozu qoyulub. Diaqnozun təsdiqlənməsindən sonra təcili cərrahi müdaxilə qərarı verilib.

Əməliyyat cərrah Cəbrayıl Xocaxovun rəhbərliyi ilə cərrah Azər Salmanov, anestezioloq Teymur Həsənov və orta tibb personalının iştirakı ilə icra olunub.

Cərrahi müdaxilə zamanı strangulyasion düyün açılıb, qarın boşluğu sanasiya edilərək drenaj olunub. Müasir tibbi avadanlıqların imkanları və tibbi heyətin operativ fəaliyyəti sayəsində bağırsağın canlılığını qorumaq və keçiriciliyini cəmi üç kiçik dəlik vasitəsilə həyata keçirilən minimal invaziv üsulla bərpa etmək mümkün olub.

Əməliyyatdan sonrakı dövrdə pasiyentin vəziyyəti dinamik müşahidə altında saxlanılıb. Ümumi vəziyyəti qənaətbəxş qiymətləndirilən pasiyent cərrahın nəzarəti altında evə yazılıb.