Azərbaycan Tibb Universitetinin (ATU) Data Analitika və Süni İntellekt Iaboratoriyasının və Elmi tədqiqatların idarə olunması departamentinin Startap və kommersiyalaşdırma şöbəsinin təşkilatçılığı ilə həyata keçirilən “AI in Medicine Innovation” təlim proqramı çərçivəsində növbəti görüş baş tutub.

ATU-dan Aztibb.az-a bildirilib ki, təlim proqramının ilk praktik məşğələsi “Klinik problemin müəyyənləşdirilməsi” mövzusuna həsr olunub. Məşğələdə iştirakçılar əldə etdikləri nəzəri bilikləri real klinik problemlər üzərində tətbiqi, müxtəlif yanaşmaların müzakirəsi və süni intellekt əsaslı innovativ həll istiqamətlərini müəyyənləşdirmək imkanı əldə ediblər.

Qeyd edək ki, “AI in Medicine Innovation” təlim proqramı süni intellektin tibbdə tətbiqi üzrə nəzəri və praktik biliklərin formalaşdırılması, tələbələrin innovativ düşüncə və layihə hazırlama bacarıqlarının inkişafı, eləcə də səhiyyə sahəsində müasir texnologiyaların tətbiqinin təşviqinə yönəlib.

Proqram Birləşmiş Millətlər Təşkilatının müxtəlif Dayanıqlı İnkişaf Məqsədləri ilə də uzlaşır. Belə ki, tibbi problemlərin həllində süni intellektdən istifadənin təşviqi DİM 3 – Sağlamlıq və rifah məqsədinə, tələbələrin bilik və bacarıqlarının inkişafı DİM 4 – Keyfiyyətli təhsil məqsədinə, innovativ texnoloji həllərin hazırlanmasının dəstəklənməsi isə DİM 9 – Sənaye, innovasiya və infrastruktur məqsədinə töhfə verir.