Azərbaycan Tibb Universitetində (ATU) Azərbaycan İdman Akademiyasının İdman Tibbi Tədqiqatları Laboratoriyası ilə fizioterapiya və tibbi reabilitasiya sahəsində kadr hazırlığının təkmilləşdirilməsi, elmi-praktik əməkdaşlığın genişləndirilməsi məqsədilə görüş keçirilib.

ATU-dan Aztibb.az-a bildirilib ki, fizioterapiya və tibbi reabilitasiya ixtisası üzrə rezidentlər, eləcə də fizioterapiya ixtisasında təhsil alan bakalavr və magistrantların iştirak etdiyi tədbirdə laboratoriyanın direktor Rauf Əliyev idman klublarında və milli yığma komandalarda fizioterapiya və tibbi reabilitasiya üzrə ixtisaslı mütəxəssislərə olan ehtiyacı vurğulayıb. O, iştirakçılara ixtisaslarının gələcək karyera perspektivləri, idman təbabətində fizioterapiya və reabilitasiyanın rolu, həmçinin nəzəri biliklərin praktiki bacarıqlarla möhkəmləndirilməsinin əhəmiyyəti barədə məlumat verib.

Görüş zamanı rezident və tələbələrin sualları cavablandırılıb, qarşılıqlı fikir mübadiləsi aparılıb.

Görüşün nəticəsi olaraq, rezidentlərin rotasiyalarının, bakalavr tələbələrinin istehsalat təcrübəsinin və magistrantların elmi-tədqiqat təcrübəsinin İdman Tibbi Tədqiqatları Laboratoriyasında təşkili barədə razılıq əldə olunub. Bu əməkdaşlığın təhsilalanların praktiki bilik və bacarıqlarının inkişafına, elmi tədqiqatların təşviqinə və gələcək mütəxəssislərin peşəkar fəaliyyətə hazırlanmasına töhfə verməsi nəzərdə tutulur.

Təşəbbüs çərçivəsində sağlamlığın qorunması, xəstəlik və zədələrdən sonra bərpa prosesinin dəstəklənməsi və reabilitasiya xidmətlərinin inkişafı (DİM 3 – Sağlamlıq və rifah), tələbələrin nəzəri biliklərinin praktiki təcrübə ilə möhkəmləndirilməsi və keyfiyyətli peşəkar hazırlığın təmin edilməsi (DİM 4 – Keyfiyyətli təhsil), eləcə də fizioterapiya və tibbi reabilitasiya sahəsində ixtisaslı kadrlara olan tələbatın qarşılanması və məşğulluq imkanlarının genişləndirilməsi (DİM 8 – Layiqli əmək və iqtisadi artım*) baxımından əhəmiyyət daşıyan istiqamətlər diqqət mərkəzində olub.

Bu əməkdaşlıq təhsil, elmi tədqiqat və praktiki fəaliyyət arasında əlaqələrin gücləndirilməsinə, fizioterapiya və tibbi reabilitasiya sahəsində peşəkar kadr potensialının inkişafına xidmət edir.