Antibiotiklərə davamlı vərəm zamanı müalicə hər bir xəstə üçün fərdi şəkildə müəyyən edilir. Bunu infeksionist həkim, tibb elmləri namizədi, RUDN Universitetinin dosenti Sergey Voznesenski bildirib.

Aztibb.az "Life" portalına istinadən yazır ki, onun sözlərinə görə, bəzi mikobakteriyalar yalnız müəyyən dərmanlara qarşı həssaslığını itirə bilər, digərləri isə daha geniş dərman rezistentliyinə malik olur.

Adi müalicənin kifayət qədər effektiv olmadığı hallarda həkimlər ikinci sıra preparatlardan və ehtiyat dərman vasitələrindən istifadə edirlər.

Vərəm əsasən hava-damcı yolu ilə yayılır. Lakin xəstə şəxslə təmasda olmaq hələ insanın mütləq yoluxması demək deyil.

“Bunun üçün immunitetin zəifləməsi və digər yanaşı xəstəliklərin mövcudluğu kimi meyilləndirici amillər tələb olunur”, – deyə ekspert bildirib.

Xəstəliyin vaxtında aşkarlanması üçün o, hər il flüoroqrafik müayinədən keçməyi tövsiyə edib. Bu müayinə vərəmin əlamətlərini xəstəliyin nəzərəçarpan simptomları ortaya çıxmamışdan əvvəl aşkar etməyə və şəxsi əlavə diaqnostik müayinələrə yönləndirməyə imkan verir.