Rusiyalı alimlər ürək-damar xəstəlikləri və şəkərli diabetin inkişaf riskini uzunmüddətli proqnozlaşdırmağa imkan verən riyazi model hazırlayıblar. Tədqiqat Novqorod Dövlət Universiteti və Cənubi Ural Dövlət Tibb Universitetinin mütəxəssisləri tərəfindən aparılıb.

Aztibb.az "İzvestiya" nəşrinə istinadən yazır ki. model beş əsas göstəricini nəzərə alır: “pis” xolesterinin səviyyəsi, yaş, cins, leptin və fibrinogen göstəriciləri. Tədqiqat nəticələri xəstəliklərin inkişaf mexanizmlərinin qadın və kişilərdə fərqləndiyini göstərib.

Araşdırma çərçivəsində 18–44 yaş arasında olan 251 pasiyentin sağlamlıq vəziyyəti 10 il ərzində izlənilib. İlkin müayinələr 2013–2016-cı illərdə, təkrar müayinələr isə 2023–2026-cı illərdə aparılıb. Alimlər əldə olunan məlumatlar əsasında modeli təkmilləşdirərək onun uzunmüddətli proqnoz dəqiqliyini qiymətləndiriblər.

Tədqiqat göstərib ki, metabolik sindromun risk faktorları qadın və kişilərdə fərqli xarakter daşıyır. Qadınlarda yüksək leptin, kişilərdə isə yüksək “pis” xolesterin daha əhəmiyyətli göstəricilərdən biri olub.

Alimlərin fikrincə, xüsusilə 18–44 yaş dövrü ağır ürək-damar və metabolik xəstəliklərin qarşısının alınması baxımından mühüm “imkan pəncərəsidir”. Risk faktorlarının bu mərhələdə müəyyənləşdirilməsi gələcəkdə xəstəliklərin inkişafının qarşısının alınmasına kömək edə bilər.

Bununla belə, modelin klinik praktikada tətbiqindən əvvəl onun daha böyük pasiyent qruplarında sınaqdan keçirilməsi tələb olunur.