Ürək qapaqları ildə on milyonlarla dəfə açılıb-bağlanmasına baxmayaraq, onilliklər ərzində möhkəmliyini qoruyur. Alimlər müəyyən ediblər ki, toxumanın düzgün istiqamətdə gərilməsi kollagen zülalını parçalayan fermentlərin təsirinə qarşı davamlılığı artıra bilər.

Aztibb.az "Medicalmedia" nəşrinə istinadən yazılr ki, ABŞ-ın Şimali Karolina Ştat Universitetinin tədqiqatçısı Şedou Xuanın rəhbərlik etdiyi araşdırmada donuz ürək qapaqlarının toxumaları laboratoriyada sınaqdan keçirilib. Nəticələr göstərib ki, kollagenin qorunmasında təkcə gərilmənin gücü deyil, onun hansı istiqamətlərdə paylanması da mühüm rol oynayır.

Toxuma fizioloji şəraitə uyğun şəkildə gərildikdə kollagen fermentlərin təsirinə daha davamlı olub. Gərilmənin istiqamətləri arasındakı nisbət dəyişdirildikdə isə kollagenin parçalanması müşahidə edilib.

Alimlər bunu gərilmənin kollagen molekullarının quruluşunu dəyişərək fermentlərin zülala çıxışını çətinləşdirməsi ilə izah edirlər. Lakin həddindən artıq və ya patoloji yüklənmə qoruyucu təsiri poza bilər.

Tədqiqatın nəticələri ürək qapaqlarının bəzi xəstəliklər zamanı niyə daha sürətlə zədələndiyini anlamağa, eləcə də daha davamlı süni ürək qapaqlarının hazırlanmasına kömək edə bilər. Bunun üçün yeni materiallarda yalnız qapağın formasını deyil, təbii toxumaya xas gərilmə xüsusiyyətlərini də təqlid etmək vacibdir.

Tədqiqat qrupu bildirib ki, nəticələr laboratoriya tədqiqatlarına əsaslanır. Bu mexanizmin insanlarda ürək qapaqlarının ömrünü nə dərəcədə uzada biləcəyini müəyyənləşdirmək üçün əlavə araşdırmalara ehtiyac var.