Fəal olduqları indiki fəsildə kirpilər ağır, hətta ölümcül infeksiyaların daşıyıcısı ola bilər.
Aztibb.az "Medikforum"a istinadən yazır ki, infeksionist həkim Yelizaveta Polomoşnovanın sözlərinə görə, əsas təhlükə geniş yaraların deyil, dərin deşilmə və dişləmə xəsarətlərinin yaranmasıdır.
“İti diş və ya çirkli iynə şpris kimi təsir göstərərək toxumalara nüfuz edir və bakteriyaları onların sürətlə çoxala biləcəyi qapalı mühitə daxil edir. Xaricdən xəsarət kiçik nöqtə və ya cızıq şəklində göründüyü üçün insanlar çox vaxt tibbi yardıma müraciət etmirlər. Halbuki infeksiya artıq daxildə inkişaf etməyə başlayır”, – deyə mütəxəssis bildirib.
Əsas təhlükələr arasında quduzluq xüsusi yer tutur. Bu xəstəliyin ölümcüllüyü 100 faizə çata bilər və təmasdan sonra dərhal peyvəndlənmə tələb olunur. Peyvənd sxemi 0-3-7-14-30-90-cı günlər üzrə aparılır.
Digər təhlükəli infeksiya tetanusdur. Xüsusilə dərin və çirkli yaralar zamanı bu xəstəliyin yaranma riski artır. Əgər tetanusa qarşı peyvənd son 10 il ərzində yenilənməyibsə, təcili profilaktik tədbirlər görülməsi və anatoksinin tətbiqi tələb oluna bilər.
Tulyaremiya da kirpilərlə təmas zamanı nəzərə alınmalı infeksiyalardandır. Nadir rast gəlinməsinə baxmayaraq, müalicə olunmadıqda pnevmoniya, meningit və oynaqların zədələnməsi kimi ağır fəsadlara səbəb ola bilər.
Bundan əlavə, kirpilər üzərlərində gənələr daşıya bilər. Bu isə insan üçün gənə ensefaliti, Laym xəstəliyi, anaplazmoz və erlihioz kimi infeksiyalara yoluxma riski yaradır. Kirpi ilə təmas zamanı göbələk mənşəli dəmrov və birə vasitəsilə yayılan infeksiyalara yoluxmaq da mümkündür.
Mütəxəssis kirpi ilə təmasdan sonra yaranan xəsarət zamanı ilkin tibbi yardımın dərhal göstərilməsini tövsiyə edir. Yara 10–15 dəqiqə ərzində su və sabunla yuyulmalı, daha sonra xlorheksidin və ya hidrogen peroksidlə işlənməli və üzərinə quru sarğı qoyulmalıdır. Bundan sonra mümkün qədər tez travmatologiya məntəqəsinə müraciət etmək lazımdır.
Yaradan qanı sıxaraq çıxarmaq və ya onu yandırmaq olmaz. Bu cür müdaxilələr infeksiyanın yayılmasını sürətləndirə bilər.
