66 yaşlı amerikalı Tim Endryus dünyada genetik modifikasiya olunmuş donuzdan köçürülmüş böyrəklə doqquz ay yaşayan və daha sonra uğurla insan donorunun böyrəyini qəbul edən ilk şəxs olub.

Aztibb.az xəbər verir ki, bu barədə "The New York Times" (NYT) məlumat yayıb.

Hipertoniya və diabetdən əziyyət çəkən Endryusun nadir qan qrupu olduğundan uyğun insan böyrəyini gözləyərək transplantasiya olunmaq şansı olduqca aşağı idi. O, 2025-ci ilin yanvarında Massaçusets Xəstəxanasında eksperimental əməliyyata razılıq verib və orqanizmin böyrəyi rədd etməsi riskini azaltmaq məqsədilə 69 genetik dəyişiklik edilmiş donuzun böyrəyini qəbul edib.

Donuz böyrəyi 271 gün ərzində normal fəaliyyət göstərərək xəstənin qanını təmizləyib. Bu müddətdə Endryusun iştahı bərpa olunub və əzələ kütləsi artıb.

Lakin doqquz ay sonra böyrəkdə qan laxtalarının əmələ gəlməsi səbəbindən həkimlər orqanı çıxarmaq qərarına gəliblər. 2026-cı ilin yanvarında isə Endryusa uyğun insan donorundan götürülmüş böyrək köçürülüb. Bundan sonra o, vəfat etmiş donordan böyrək transplantasiyası həyata keçirilənədək 82 gün dializ müalicəsi alıb.

ABŞ-ın Qida və Dərman Administrasiyasının (FDA) proqramı çərçivəsində ümumilikdə beş xəstəyə biotexnologiya şirkəti eGenesis tərəfindən hazırlanmış donuz böyrəkləri köçürülüb. Onlardan üçünün bu orqanlarla səkkiz aydan artıq müddətdə yaşadığı bildirilir.