Rusiyada piylənmənin müalicəsi üzrə klinik tövsiyələrə pasiyentin bədən kompozisiyasını qiymətləndirmək üçün bioimpedans analizinin daxil edilməsi təklif olunur.

Aztibb.az "Gazeta" nəşrinə istinadən yazır ki, bu müddəa Rusiya Endokrinoloqlar Assosiasiyası, Bariatrik Cərrahlar Cəmiyyəti, Rusiya Terapevtlər Elmi-Tibb Cəmiyyəti və Rusiya Qeyri-infeksion Xəstəliklərin Profilaktikası Cəmiyyəti tərəfindən hazırlanmış sənəd layihəsində yer alıb.

Sənədə əsasən, piylənmə diaqnozu qoyulmuş pasiyentlərdə suyun, əzələ və piy toxumasının faiz nisbətinin bioimpedansometriya vasitəsilə müəyyənləşdirilməsi tövsiyə edilir. Bu üsul bədəndən zəif və təhlükəsiz elektrik cərəyanı keçirildikdə orqanizmin toxumalarının göstərdiyi elektrik müqavimətinin (impedansın) ölçülməsinə əsaslanır.

Sənəddə bildirilir ki, metodun əsas üstünlüklərindən biri şüalanma yükünün olmaması, eləcə də müayinələrin dinamikada aparılmasının mümkünlüyüdür.

Layihənin müəllifləri həmçinin qeyd ediblər ki, bioimpedans analizinin nəticələrinin dəqiqliyi rentgen densitometriyasının göstəricilərinə yaxındır.

Bundan əlavə, bu müayinədən zamanla bədənin kompozisiya göstəricilərində baş verən dəyişiklikləri qiymətləndirmək və pasiyentin müalicəyə motivasiyasını və müalicəyə sadiqliyini qorumaq üçün istifadə etmək mümkündür.