Rusiyada 2026-cı il sentyabrın 1-dən 11 regionda səyyar apteklərin fəaliyyəti üzrə üçillik pilot layihəyə start veriləcək. Layihə əsasən stasionar apteklərin olmadığı ucqar və kənd yaşayış məntəqələrini əhatə edəcək.
Aztibb.az xəbər verir ki, səyyar apteklər Arxangelsk, Volqoqrad, Nijni Novqorod, Tümen, Stavropol, Krasnodar, Krasnoyarsk, Kabardin-Balkar, Buryatiya, Kalmıkiya və Donetsk bölgəsində fəaliyyət göstərəcək. Marşrutlar və səfər cədvəlləri yerli hakimiyyət orqanları tərəfindən əvvəlcədən təsdiqlənərək sakinlərə elan olunacaq.
Səyyar apteklərdə həm reseptli, həm də reseptsiz dərman vasitələri satılacaq. Narkotik və psixotrop preparatlar, immunobioloji vasitələr, yüksək faizli spirt tərkibli dərmanlar və xüsusi aşağı temperaturda saxlanılması tələb olunan preparatların satışı isə qadağan ediləcək.
Layihə 2029-cu il sentyabrın 1-dək davam edəcək. Sakinlər müntəzəm marşrutlar sayəsində dərmanları əvvəlcədən sifariş edib növbəti səfər zamanı təhvil ala biləcəklər.
