Rusiyada 1 oktyabr 2026-cı ildən stomatoloji xidmətlərin göstərilməsi ilə bağlı yeni qaydalar qüvvəyə minəcək. Dəyişikliklər xəstələrin ağrısız müalicəsini və ağız boşluğunda onkoloji xəstəliklərin daha erkən aşkarlanmasını hədəfləyir.

Aztibb.az xəbər verir ki, Rusiya Səhiyyə Nazirliyinin yeni qaydalarına əsasən, ağrıya səbəb ola biləcək istənilən stomatoloji müdaxilə anesteziya ilə aparılmalıdır. Zəruri hallarda tibbi göstəriş əsasında sedasiya və ya ümumi anesteziyadan da istifadə edilə bilər.

Yeni qaydalara görə, stomatoloqlar qəbul zamanı yalnız pasiyentin müraciət etdiyi problemin müalicəsi ilə kifayətlənməyəcək. Ağız boşluğu bədxassəli şişlərin mümkün əlamətlərinin aşkarlanması məqsədilə də müayinə olunacaq. Şübhəli hal müəyyən edildikdə pasiyent onkoloqa yönləndiriləcək.

Stomatoloji kabinetlərin təcili tibbi yardım üçün zəruri vasitələrlə, o cümlədən avtomatik xarici defibrilyator və anafilaktik şok zamanı istifadə olunan dərman və tibbi ləvazimatlarla təchiz edilməsi də nəzərdə tutulur.

Qaydalarda stomatoloji yardımın ilkin, ixtisaslaşdırılmış və yüksək texnologiyalı olmaqla üç səviyyəyə bölünməsi, eləcə də ilkin yardımı göstərə biləcək mütəxəssislərin dairəsinin genişləndirilməsi nəzərdə tutulur.

Mütəxəssislər bildirirlər ki, müasir stomatologiyada anesteziya pasiyentin rahatlığını təmin etməklə yanaşı, həkimə proseduru daha dəqiq və təhlükəsiz həyata keçirməyə imkan verir. Anesteziya növü isə müdaxilənin xarakteri və pasiyentin fərdi xüsusiyyətləri nəzərə alınmaqla seçilməlidir.