Krasnodarda tufandan sonra 100-dən çox sakin güclü öskürək və nəfəs darlığı səbəbilə tibbi yardıma müraciət edib.

Aztibb.az xəbər verir ki, avqustun 27-nə keçən gecə xəstəxanalara müraciət edən sakinlər kəskin nəfəsalma çətinliyi, güclü öskürək və boğulma hissindən şikayətləniblər.

Məlumata görə, vəziyyətin pisləşməsinə tufan zamanı güclü küləyin ambroziya tozcuqlarını havaya yayması səbəb olub. Bu hal “ildırım astması” kimi tanınan kəskin allergik reaksiyalara yol aça bilər.

Mövsümi allergiyanın əsas əlamətləri burun tutulması, asqırma, boğazda qıcıqlanma, xırıltılı nəfəsalma və nəfəs darlığıdır. Bəzi hallarda allergik reaksiyalar bronxial astmanın inkişafına səbəb ola bilər.

Mütəxəssislər mövsümi allergiyanın müalicəsiz qalmasının simptomların ildən-ilə güclənməsinə və orqanizmin daha çox allergenə həssaslaşmasına səbəb ola biləcəyi barədə xəbərdarlıq edirlər.