Alkoqolsuz pivə qəbul etdikdən sonra avtomobil idarə etmək təhlükəsiz olmaya bilər.

Aztibb.az xəbər verir ki, İrkutsk vilayətinin psixonevroloji dispanserinin narkoloqu Andrey Sergeyev alkoqolsuz pivənin tərkibində az miqdarda etanol ola biləcəyini bildirib.

Mütəxəssisin sözlərinə görə, bir neçə banka və ya butulka alkoqolsuz pivənin ardıcıl qəbul edilməsi nəticəsində orqanizmdə etanolun ümumi miqdarı arzuolunmaz səviyyəyə çata bilər.

Həkim həmçinin qeyd edib ki, belə içkilərdən sonra ağızda xarakterik qoxu qala bilər və bu, yol polisi əməkdaşlarında şübhə yarada bilər.

Sergeyev az miqdarda alkoqolun belə diqqətin azalmasına və reaksiyanın zəifləməsinə səbəb ola biləcəyini vurğulayıb. Bu səbəbdən alkoqolsuz pivə qəbul etdikdən sonra sükan arxasına keçməmək tövsiyə olunur.