Rusiyada melanomaya qarşı hazırlanmış fərdiləşdirilmiş “NeoOnkovak” xərçəng peyvəndi ilə ilk pasiyentin müalicəsinin uğurla davam etdiyi açıqlanıb.

Aztibb.az xəbər verir ki, bunu Rusiyanın N.F. Qamaleya adına Milli Epidemiologiya və Mikrobiologiya Tədqiqat Mərkəzinin elmi rəhbəri Aleksandr Gintsburq bildirib. Preparat ilk dəfə aprelin 1-də pasiyentə tətbiq edilib və müalicə kursunun sentyabr ayında başa çatdırılması planlaşdırılır.

“NeoOnkovak” hər bir pasiyent üçün fərdi şəkildə hazırlanır. mRNT texnologiyasına əsaslanan peyvənd konkret şişdə aşkar edilən mutasiyalar nəzərə alınmaqla hazırlanır.

Mütəxəssislərin bildirdiyinə görə, ilin sonunadək peyvəndin daha 20 onkoloji xəstə üçün hazırlanması planlaşdırılır. Onlardan 12 nəfərin yaxın vaxtlarda müalicəyə cəlb ediləcəyi gözlənilir.

Preparat Qamaleya Mərkəzində hazırlanıb, istehsalı isə Rusiya Radiologiya Milli Tibb Tədqiqat Mərkəzində həyata keçirilir.