Tip 2 diabet qadın və kişilərdə yanaşı xəstəliklərin inkişafına fərqli təsir göstərə bilər.

Aztibb.az xəbər verir ki, Böyük Britaniyada aparılan yeni araşdırmada tip 2 diabet diaqnozu alan 28 720 nəfərin sağlamlıq göstəriciləri təhlil edilib. Tədqiqatçılar xəstəliyin qadın və kişilərdə yaratdığı yanaşı problemlər və bu fərqlərin yaş qruplarına görə necə dəyişdiyini araşdırıblar.

İştirakçılar orta hesabla 6,8 il izlənilib. Onların 62 faizini kişilər təşkil edib. Araşdırmada diabetdən əvvəl hipertoniya, depressiya, narahatlıq, somatoform pozuntular, ürək-damar və son mərhələ böyrək xəstəlikləri diaqnozu olan şəxslər nəzərə alınmayıb.

Nəticələr göstərib ki, tip 2 diabetli qadınlarda psixi sağlamlıq problemləri kişilərlə müqayisədə daha çox inkişaf edir. Kişilərdə isə ürək-damar xəstəlikləri və son mərhələ böyrək xəstəliyinə daha yüksək nisbətdə rast gəlinib.

Tədqiqat müəllifləri hesab edirlər ki, əldə olunan nəticələr diabetin müalicəsində qadın və kişilər üçün fərdiləşdirilmiş yanaşmaların hazırlanmasına kömək edə bilər.

Araşdırma PLOS Medicine jurnalında dərc olunub.