Təmizlik məhsullarının xoş sitrus, şam və ya çiçək qoxusu gözlənilməz risklə müşayiət oluna bilər. Yeni araşdırmaya görə, bu məhsulların tərkibindəki ətirlər daxili havadakı ozonla reaksiyaya girərək ağciyərlərin dərinliklərinə qədər çata bilən ultraxırda hissəciklər əmələ gətirə bilər.

Aztibb.az xəbər verir ki, tədqiqatçılar model evdə döşəmələrin silinməsi, səthlərə sprey vurulması və ətirli məhsullarla təmizlik zamanı milyardlarla, hətta trilyonlarla ultraxırda hissəciyin yarandığını müəyyən ediblər. Tədqiqatçılar bu hissəciklərin tənəffüs yolu ilə qəbul edilən miqdarının sıx nəqliyyat olan yol kənarında açıq havada dayanmaqla müqayisə edilə biləcəyini, bəzi hallarda isə daha yüksək ola biləcəyini bildiriblər.

Purdue Universitetinin professoru Brandon Boorun sözlərinə görə, təmizlik səthlərdəki virus və bakteriyaları aradan qaldırsa da, eyni zamanda görünməyən hava çirkliliyi yarada bilər.

Alimlər bu qədər kiçik hissəciklərin tənəffüs yollarında qıcıqlanma və iltihaba səbəb ola biləcəyini, hətta qan dövranına keçə biləcəyini ehtimal edirlər.

Mütəxəssislər məruz qalmanı azaltmaq üçün az ətirli və ya ətirsiz məhsullardan istifadə etməyi, eyni vaxtda çoxsaylı ətirli məhsullardan istifadə etməməyi, həmçinin təmizlik zamanı pəncərələri açmağı və ya havalandırma sistemindən yararlanmağı tövsiyə edirlər.

Araşdırmanın nəticələri ABŞ-ın Çikaqo şəhərində keçirilən Amerika Kimya Cəmiyyətinin toplantısında təqdim olunur. Nəticələr elmi jurnalda resenziyadan keçmiş şəkildə dərc edilənədək ilkin hesab olunur.