Klinik psixoloq Darya Salnikovanın sözlərinə görə, yayın başa çatmasından sonra yaranan apatiya insanın özünü günahlandırması üçün səbəb olmamalıdır. Onun fikrincə, emosional yüksəliş və enişlər təbii prosesdir və insan bütün il ərzində özündən eyni məhsuldarlığı gözləməməlidir.

Aztibb.az "Medvestnik"ə istinadən yazır ki, payız aylarında rahat gündəlik ritmi qorumaq və istirahəti əvvəlcədən planlaşdırmaq vacibdir. Həftə ərzində bir neçə saatı istirahətə ayırmaq, eləcə də oktyabr və noyabr aylarında qısa məzuniyyət və ya həftəsonu istirahəti planlaşdırmaq yeni mövsümə daha sakit keçidə və narahatlığın azalmasına kömək edə bilər.

Psixoloq qeyd edib ki, insan aktiv dövrdən sonra müəyyən müddət apatiya yaşayacağını əvvəlcədən qəbul edərsə, bu vəziyyətə görə özünü günahlandırmaz. Belə bir dövrü sakit şəkildə keçirmək və daha sonra adi həyata qayıtmaq lazımdır.

Mütəxəssis həmçinin mövsümlərin təbii dəyişməsini nəzərə almağın vacibliyini vurğulayıb. Payızda gündüzlər qısalır, hava soyuyur və orqanizmin yeni şəraitə uyğunlaşması üçün müəyyən vaxt tələb olunur. Buna görə yorğunluq və əhval-ruhiyyənin müvəqqəti aşağı düşməsi bir çox hallarda normal haldır.