Rospotrebnadzor arıqlama vasitələrinin satışını onların tərkibində sibutramin maddəsinin aşkar edilməsi ilə bağlı məlumatlardan sonra yoxlamağa başlayıb. Söhbət Supressa, Ultra Lipo 3, Mineral Balance və S Figura Slim markaları altında satılan məhsullardan gedir.

Aztibb.az "Life" portalına istinadən yazır ki, qurumun məlumatına görə, adıçəkilən vasitələr AİİB-nin (Avrasiya İqtisadi İttifaqı) məhsulların dövlət qeydiyyatı haqqında şəhadətnamələrinin Vahid Reyestrində yer almır. Aparılan yoxlamalar qeydiyyatdan keçməmiş məhsulların satışına aiddir.

Yoxlamaya mediada yayılan və adıçəkilən arıqlama vasitələrinin tərkibində sibutramin aşkar edildiyini bildirən məlumatlar səbəb olub. Bununla belə, Rospotrebnadzor öz açıqlamasında hələlik laboratoriya tədqiqatlarının nəticələrini təsdiqləməyib.

Qurum həmçinin İnternet Ticarəti Şirkətləri Assosiasiyasına müraciət edib. Bazar iştirakçılarına sözügedən məhsulların dövriyyədən çıxarılması üçün təcili tədbirlər görmək təklif olunub.

Alıcılara isə bioloji aktiv qida əlavələri (BAQ) almadan əvvəl məhsulun dövlət qeydiyyatı haqqında şəhadətnaməsinin olub-olmadığını yoxlamaq tövsiyə edilib. Bu sənəd məhsulun dövriyyəyə buraxılmasına icazə verildiyini təsdiqləyir.

Qeyd edək ki, hələ 2025-ci ildə Təhlükəsiz İnternet Liqasının rəhbəri Yekaterina Mizulina marketpleyslərə yeniyetmələr arasında geniş istifadə olunan "Molekula" adlı arıqlama preparatının satışdan çıxarılması çağırışı etmişdi. Preparat reseptsiz satılır və münasib qiymətə əldə edilə bilir.

Preparatın tərkibində əsasən bitki "ekstraktlarının" olduğu göstərilsə də, yayılan məlumatlara görə, onun tərkibində sağlamlıq üçün təhlükəli maddələr də ola bilər. Bununla əlaqədar istifadəçilər yuxusuzluqdan tutmuş dişlərin kövrəkləşməsi və ürək ritminin pozulmasına qədər müxtəlif yan təsirlərdən şikayət ediblər.