Sağlam insanların, görmə ilə bağlı problemi olmadığı halda, profilaktik məqsədlə xüsusi “göz vitaminləri” qəbul etməsinə ehtiyac yoxdur. Vitamin kompleksləri göz xəstəliklərinin qarşısının alınmasında, nadir hallar istisna olmaqla, effektiv hesab edilmir.

Aztibb.az xəbər verir ki, oftalmoloq Anatoli Mavridi göz sağlamlığı üçün vitaminlərin istifadəsi ilə bağlı açıqlamasında bildirib ki, hər hansı kompleks qəbul etməzdən əvvəl oftalmoloq müayinəsindən keçmək və mütəxəssis tövsiyəsi almaq daha doğrudur.

Mütəxəssisin sözlərinə görə, bəzi göz xəstəliklərində vitamin və qida əlavələrindən müalicənin bir hissəsi kimi istifadə oluna bilər. Məsələn, yaşla bağlı makula degenerasiyasının müəyyən mərhələlərində AREDS2 tərkibli komplekslərin istifadəsi tövsiyə edilir. Keratokonus zamanı isə riboflavin (B2 vitamini) krosslinkinq prosedurunda tətbiq olunur.

Vitamin çatışmazlığı da nadir hallarda göz problemlərinə səbəb ola bilər. A vitamini çatışmazlığı kseroftalmiya, gecə korluğu və buynuz qişada ciddi dəyişikliklərlə, B12 çatışmazlığı isə optik nevritlə əlaqələndirilir. Xüsusilə vegan və vegetarian qidalanan şəxslərdə B12 səviyyəsinə diqqət yetirmək vacibdir.

Oftalmoloq qeyd edib ki, bəzi xəstəliklər zamanı müəyyən vitaminlərin əlavə qəbulundan çəkinmək lazımdır. Məsələn, ABCA4 gen mutasiyaları ilə əlaqəli bəzi xəstəliklərdə A vitamini əlavələri, piqmentar retinitdə isə yüksək dozada E vitamini arzuolunmaz ola bilər.

Vitamin D ilə bağlı araşdırmalar isə onun çatışmazlığının dağınıq sklerozun inkişaf riskində rol oynaya biləcəyini göstərir. Bununla belə, vitamin D-nin əlavə qəbulunun müalicədəki rolu fərdi qiymətləndirilməlidir.

Mütəxəssis sağlam gözlər üçün əsas yanaşmanın balanslı və müxtəlif qidalanma, fiziki aktivlik, açıq havada vaxt keçirmək, düzgün görmə rejimi və arterial təzyiq, qan şəkəri, xolesterin kimi risk faktorlarına nəzarət olduğunu vurğulayıb.