Günəş işığının azalması, qeyri-balanslı qidalanma və gündəlik stres insan orqanizmində vacib vitamin və mineralların defisitinə yol açır. Bir çox hallarda insanlar xroniki yorğunluq, dəri problemləri və ya halsızlığı sadəcə iş rejiminin gərginliyi ilə əlaqələndirirlər.

Aztibb.az "Everydayhealth" nəşrinə istinadən yazır ki, bədənimiz daxili balansın pozulduğunu fərqli simptomlarla büruzə verərək bizə aşkar siqnallar göndərir.

İnsan orqanizmində vitamin çatışmazlığı özünü ilk növbədə xarici görünüşdə və ümumi əhval-ruhiyyədə göstərir. Məsələn, saçların həddindən artıq tökülməsi, dırnaqların tez qırılması və ya tez-tez ağız ətrafında yaraların əmələ gəlməsi B qrupu vitaminlərinin, xüsusən B7 (biotin) və B12-nin yetərsizliyindən xəbər verir. Dəridə quruluq, soyulma və ya yaraların gec sağalması isə A və C vitaminlərinin çatışmadığını göstərir.

Xüsusilə dəmir və B12 vitamini çatışmazlığı zamanı toxumalara oksigen daşınması zəiflədiyi üçün şəxsdə daimi halsızlıq, başgicəllənmə və diqqət əskikliyi müşahidə olunur. Əzələlərdə səbəbsiz ağrılar, oynaq xəstəlikləri və sümük zəifliyi isə orqanizmdə D vitamini və kalsium balansının pozulmasının başlıca göstəricisidir. İmmunitet sisteminin zəifləməsi nəticəsində tez-tez yoluxucu xəstəliklərə tutulmaq da bədənin müqavimət gücünü itirdiyinə işarə edir.

Mütəxəssislər bildirirlər ki, bu simptomlar müşahidə edildikdə həkim məsləhəti olmadan kor-koranə vitamin preparatları qəbul etmək doğru deyildir. Çünki normadan artıq qəbul edilən vitaminlər də ən az çatışmazlıq qədər orqanizmə, xüsusən qaraciyər və böyrəklərə zərər vura bilər. Ən düzgün addım müvafiq qan analizləri verərək defisiti dəqiq müəyyənləşdirmək və mütəxəssis nəzarəti altında balansı bərpa etməkdir.