Qoturluq (skabiez) Sarcoptes scabiei gənəsinin törətdiyi yoluxucu dəri xəstəliyidir. Dermatoloq Elanə Rəsulovanın bildirdiyinə görə, xəstəlik əsasən yoluxmuş şəxslə uzunmüddətli yaxın təmas, həmçinin istifadə olunan paltar, dəsmal və yataq dəstləri vasitəsilə asanlıqla yayıla bilir.

Aztibb.az xəbər verir ki, mütəxəssisin sözlərinə görə, qoturluğun ən xarakterik əlaməti gecə saatlarında daha da güclənən intensiv qaşınmadır. Bundan əlavə, dəridə xırda səpgilər, qaşıntı və cızıq izləri də müşahidə oluna bilər.

Elanə Rəsulova bildirir ki, qoturluq tam müalicə olunan xəstəlikdir. Lakin müalicə yalnız dermatoloqun təyinatı və nəzarəti altında aparılmalıdır. Erkən diaqnozun qoyulması xəstəliyin daha qısa müddətdə sağalmasına və ətrafdakılara yoluxma riskinin azalmasına kömək edir.

Dermatoloq gecə saatlarında artan qaşınma və dəridə səpgilər müşahidə olunduğu halda vaxt itirmədən həkimə müraciət etməyi tövsiyə edir.

Mütəxəssis həmçinin şəxsi gigiyena qaydalarına riayət etməyin, paltar və yataq dəstlərini mütəmadi yumağın, eləcə də yoluxmuş şəxslərlə yaxın təmasdan çəkinməyin qoturluqdan qorunmaq üçün mühüm əhəmiyyət daşıdığını vurğulayır. Sağlam dərinin qorunması isə hər birimizin məsuliyyətidir.