ABŞ alimləri müəyyən ediblər ki, saat 20:00-dan sonra şam yeməyi artıq çəki riskini artıran amillərdən biri ola bilər.

Aztibb.az "İzvestiya" nəşrinə istinadən yazır ki, araşdırmaya görə, bunun səbəbi təkcə axşam saatlarında fiziki aktivliyin azalması deyil, həm də orqanizmin daxili bioloji saatı ilə əlaqədardır.

Tədqiqatda artıq çəkidən əziyyət çəkən 16 könüllü iştirak edib. İştirakçılar günəş işığı, fiziki aktivlik və adi yuxu rejimi kimi xarici amillərdən təcrid olunublar. Onlara hər altı saatdan bir eyni tərkibli qidalar verilib.

Nəticələr göstərib ki, qidanın termogen effekti, yəni orqanizmin qidanı həzm etmək üçün sərf etdiyi enerji sutkalıq bioloji ritmlərdən asılıdır. Səhər saatlarında bu göstərici ən yüksək səviyyədə olub, axşama doğru isə 44 faiz azalıb. Hətta istirahət vəziyyətində yandırılan kalorilər nəzərə alındıqdan sonra belə fərq təxminən 29 faiz təşkil edib.

Alimlərin qənaətinə görə, eyni qida səhər saatlarında qəbul edildikdə orqanizm tərəfindən axşam yeməyinə nisbətən daha səmərəli mənimsənilir. Tədqiqat müəllifləri hesab edirlər ki, bu nəticələr piylənmənin mexanizmlərinin daha yaxşı başa düşülməsinə və daha effektiv qidalanma strategiyalarının hazırlanmasına kömək edə bilər.