Beynəlxalq tədqiqatçılar qrupu müəyyən edib ki, əsas göstəriciləri yoxsulluq və aşağı təhsil səviyyəsi olan zəif sosial-iqtisadi status bioloji qocalmanın sürətlənməsi ilə birbaşa əlaqəlidir. Alimlərin fikrincə, bu tendensiya hələ uşaqlıq dövründən özünü göstərməyə başlayır.

Aztibb.az xəbər verir ki, araşdırmanın nəticələri "Nature Human Behaviour" jurnalında dərc olunub.

Maks Plank İnstitutunun alimlərinin birgə apardığı tədqiqat çərçivəsində 23 ölkədən 0–86 yaş aralığında təxminən 66 min insanı əhatə edən 140 elmi işin nəticələri təhlil edilib.

Tədqiqat zamanı qocalma sürəti epigenetik saatlar vasitəsilə qiymətləndirilib. Bu metod DNT-də baş verən molekulyar dəyişiklikləri analiz edərək orqanizmin bioloji yaşını onun təqvim yaşı ilə müqayisə etməyə imkan verir.

Mütəxəssislərin sözlərinə görə, bioloji qocalması ləng gedən insanlar yaşlarından daha gənc görünür və özlərini daha gümrah hiss edirlər. Əksinə, bioloji qocalması sürətlənən şəxslərdə yaşla əlaqəli xəstəliklər gözləniləndən daha erkən ortaya çıxır.

Araşdırma göstərib ki, aztəminatlı ailələrdə böyüyən uşaqların bioloji yaşı maddi vəziyyəti daha yaxşı olan həmyaşıdları ilə müqayisədə daha yüksəkdir. Eyni qanunauyğunluq böyüklər arasında da müşahidə olunur.

Alimlər vurğulayırlar ki, yoxsulluq və digər mənfi sosial amillər bir-birinin təsirini gücləndirərək orqanizmin qocalma prosesini sürətləndirir. Müasir və təkmilləşdirilmiş epigenetik saatlar bu əlaqəni aydın şəkildə ortaya qoyur.