Amerika Ürək Assosiasiyasının elmi konfransında təqdim olunan yeni tədqiqatın nəticələrinə görə, ürək-damar xəstəliyi olan şəxslərdə D vitamini səviyyəsinin müntəzəm izlənməsi və fərdi ehtiyaca uyğun korreksiyası infarkt riskinin azalması ilə əlaqəli ola bilər.

 

Aztibb.az-ın xəbərinə görə, tədqiqatda ürək xəstəliyi olan yüzlərlə şəxs iştirak edib. İştirakçıların böyük əksəriyyətində araşdırmanın əvvəlində D vitamini çatışmazlığı aşkarlanıb. Müalicə qrupunda D vitamini dozası qan analizlərinin nəticələrinə əsasən fərdi şəkildə tənzimlənib.

 

Nəticələrə görə, fərdiləşdirilmiş D vitamini müalicəsi alan şəxslərdə infarkt keçirmə riski təxminən 52% daha aşağı olub. Bundan əlavə, ürək-damar səbəbli xəstəxanaya yerləşdirmə, insult və öl*m kimi ciddi hadisələrin ümumi tezliyi də daha az müşahidə edilib.

 

Qeyd edək ki, D vitamini yalnız analiz nəticələrinə və həkim tövsiyəsinə əsasən qəbul edilməlidir. Araşdırmanın nəticələri ümidverici olsa da, bu məlumatların daha geniş tədqiqatlarla təsdiqlənməsinə ehtiyac var.