Harvard Universitetinin tədqiqatçıları müəyyən ediblər ki, həftədə 90–120 dəqiqə güc məşqləri erkən ölüm riskini əhəmiyyətli dərəcədə azalda bilər.

Aztibb.az xəbər verir ki, araşdırma “British Journal of Sports Medicine” jurnalında dərc olunub və ABŞ-da təxminən 150 min insanı 30 il ərzində əhatə edib. 

Həftədə təxminən iki saat güc məşqləri edən şəxslərdə bütün səbəblərdən ölüm riski 13%, ürək-damar xəstəliklərindən ölüm riski 19%, nevroloji xəstəliklərdən ölüm riski isə 27% daha aşağı olub. Lakin iki saatdan artıq məşq edənlərdə əlavə üstünlük müşahidə edilməyib.

Müəlliflər güc məşqlərinin aerobik fəaliyyətlərlə birgə aparılmasını tövsiyə edirlər. Güc məşqləri sağlam qocalma üçün xüsusilə vacib hesab olunur və xroniki xəstəliklərin qarşısının alınmasına kömək edir.

Mövcud Britaniya səhiyyə tövsiyələrinə görə, böyüklər əsas əzələ qruplarını həftədə ən azı iki gün məşq etdirməli, həmçinin həftəlik ən az 150 dəqiqə orta intensivlikli və ya 75 dəqiqə yüksək intensivlikli aerobik aktivlik etməlidirlər. Araşdırma çərçivəsində ən aşağı ölüm göstəricisi (riskin 58% azalması) həm yüksək güc, həm də aerobik aktivliyi birləşdirən şəxslərdə qeydə alınıb.