Tanınmış rusiyalı həkim Aleksandr Myasnikov bildirib ki, bəzi baş ağrıları ciddi xəstəliklərin əlaməti ola bilər və onları görməzlikdən gəlmək təhlükəlidir. Həkim bu simptomları “qırmızı siqnallar” adlandırıb.

Aztibb.az "Life" portalına istinadən yazır ki, həkimin sözlərinə görə, əgər baş ağrısı ilk dəfə gecə yuxudan oyadırsa və ya insan bunu həyatında yaşadığı “güclü ağrı” kimi təsvir edirsə, bu, təhlükəli patologiyaların xəbərçisi ola bilər.

“Həkimlərin "qırmızı siqnallar" adlandırdığı hallar var. Əgər baş ağrısı sizi gecə ilk dəfə yuxudan oyadırsa və ya bu, həyatınızda keçirdiyiniz ən dəhşətli baş ağrısıdırsa, mütləq diqqətli olmaq lazımdır”, — deyə Myasnikov vurğulayıbHəkim qeyd edib ki, xüsusilə 50 yaşdan yuxarı insanlarda ilk dəfə yaranan güclü baş ağrıları ciddi araşdırılmalıdır. Bundan əlavə, ağrının hərəkət və ya bədən vəziyyətinin dəyişməsi ilə güclənməsi də narahatedici əlamət sayılır.

Aleksandr Myasnikov əlavə edib ki, baş ağrısı nitq pozğunluğu, bədənin hər hansı hissəsində keyimə və ya hissiyat itkisi ilə müşayiət olunursa, vaxt itirmədən mütəxəssisə müraciət etmək lazımdır.

Həkimin bildirdiyinə görə, bu əlamətlər beyin şişi, təhlükəli infeksiyalar və ya beyin damarlarının anevrizması kimi həyati risk yaradan problemlərin göstəricisi ola bilər. Belə hallarda təcili tibbi yardım və ətraflı müayinə vacib hesab olunur.