Çernobıl Atom Elektrik Stansiyası ətrafındakı məhdudlaşdırılmış zona Avropanın ən böyük vəhşi məməli sığınacaqlarından birinə çevrilib. 

Aztibb.az xəbər verir ki, bununla bağlı tədqiqatın nəticələri "Proceedings of the Royal Society B" jurnalında dərc olunub.

Tədqiqat müəllifləri bildirirlər ki, insan fəaliyyətinin ciddi şəkildə məhdudlaşdırıldığı ərazilər biomüxtəlifliyin qorunmasına və heyvan populyasiyalarının bərpasına müsbət təsir göstərə bilər. Alimlərin fikrincə, radioaktiv çirklənməyə görə insanların daimi yaşaması üçün yararsız hesab edilən Çernobıl zonası illər ərzində vəhşi təbiətin bərpası üçün mühüm məkana çevrilib.

Araşdırmada vurğulanır ki, insanların bölgəni tərk etməsindən sonra burada marallar, canavarlar, qabanlar və digər vəhşi məməlilərin sayı artıb. Mütəxəssislər hesab edirlər ki, insan müdaxiləsinin azalması bəzi hallarda təbiətin özünü bərpa etməsinə imkan yaradır.

Alimlər qeyd edirlər ki, oxşar vəziyyət digər qapalı ərazilərdə də müşahidə oluna bilər. Nümunə kimi Koreya Demilitarizasiya Zonası göstərilir. İnsan fəaliyyətinin məhdud olduğu bu ərazi də zamanla bir çox canlı növü üçün təhlükəsiz yaşayış mühitinə çevrilib.

Tədqiqatçılar eyni zamanda Çernobıl zonasında yaşayan heyvanlarla bağlı geniş yayılmış bir fikrə də aydınlıq gətiriblər. Alim Denis Vişnevski bildirib ki, bölgədə heyvanlar arasında kütləvi görünən mutasiyalar qeydə alınmır. Onun sözlərinə görə, hazırkı radiasiya səviyyəsi genişmiqyaslı fiziki anomaliyalar yaratmaq üçün kifayət qədər yüksək deyil. Bundan əlavə, təbii şəraitdə ciddi genetik pozuntuları olan fərdlərin yaşamaq şansı aşağı olur.

Mütəxəssislərin fikrincə, bu araşdırma insan fəaliyyəti ilə ekosistemlərin vəziyyəti arasındakı əlaqəni bir daha göstərir və təbiətin uyğun şəraitdə özünü bərpa etmək potensialına malik olduğunu ortaya qoyur.