Həkim bildirib ki, angioqrafiya müasir tibbdə damar xəstəliklərinin diaqnostikası və müalicə yolunun seçilməsində "qızıl standart" hesab olunur.

 

Onun sözlərinə görə, kardiologiya praktikasında angioqrafiya (koronar angioqrafiya) sadə bir müayinə üsulu deyil, ürək-damar xəstəliklərinin müalicə strategiyasını təyin edən ən mühüm mərhələdir. Bu prosedur ürəyi qidalandıran damarların vəziyyətini birbaşa vizuallaşdırmağa və xəstəliyin xarakterini dəqiq anlamağa imkan verir.

 

Nailə Zərbəliyeva qeyd edib ki, müalicə prosesində angioqrafiyanın rolu əvəzsizdir. İlk növbədə, o, xəstə üçün ən doğru müalicə yolunu seçməyimizə kömək edir: damarların vəziyyətindən asılı olaraq xəstəyə konservativ dərman müalicəsi, stent taxılması (angioplastika) və ya cərrahi şuntlama əməliyyatı (bypass) təyin olunur. Xüsusilə kəskin infarkt zamanı icra olunan təcili angioqrafiya, tıxanan damarı saniyələr içində müəyyən edib açmağa və ürək əzələsinin zədələnməsinin qarşısını almağa şərait yaradır. Beləliklə, angioqrafiya həm diaqnostik bir vasitə, həm də birbaşa həyatqurtarıcı müalicəvi müdaxilədir.

 

"Müasir kardiologiyada bu prosedur minimal invaziv üsulla, yerli keyitmə altında və xəstə ilə ünsiyyət saxlanılaraq həyata keçirilir. Unutmaq olmaz ki, vaxtında aparılan angioqrafiya xəstəliyin ağırlaşma riskini minimuma endirir və xəstənin gələcək həyat keyfiyyətini təmin edir. Əgər həkiminiz sizə bu müayinəni məsləhət görübsə, bu, gələcəkdə baş verə biləcək ağır infarkt riskini vaxtında aradan qaldırmaq üçündür”, - deyə kardioloq əlavə edib.