Yaz aylarındakı günəş şüaları yay günəşi ilə müqayisədə daha çox diqqət tələb edir. Yaz günəşi yay günəşi qədər intensiv olmasa da, müəyyən mənada daha riskli hesab edilə bilər. Bunun əsas səbəbi insanların bu dövrdə daha az diqqətli olmasıdır. Hava sərin olduğu üçün günəş şüalarının zərəri hiss olunmur və nəticədə, qorunma tədbirlərinə laqeyd yanaşılır. Bu isə dəridə yığılan və sonradan üzə çıxan zədələnmələrə səbəb olur. Bunlara dəri yanığı, hiperpiqmentasiya (ləkələrin yaranması), dərinin quruması, erkən dəri qocalması və dəri xərçənginə də gətirib çıxara bilər.

 

Bu barədə Aztibb.az-a Respublika Dəri-Zöhrəvi Mərkəzinin həkim-dermatoveneroloqu Quba Rüstəmova məlumat verib.

 

Mütəxəssis bu kimi halların qarşısını almaq üçün qorunma tədbirlərinə diqqət çəkib. Bildirib ki, bu dövrdə günəş şüaları vitamin D sintezini artırsa da, qoruyucu vasitələrdən istifadə edilmədikdə dəridə zədələnmələr yarana bilir. Qoruyucu kremlərdən istifadə edilməsi tövsiyə olunur. Günəş kremi günəşə çıxmazdan 15-20 dəqiqə əvvəl çəkilməli və hər 2-2,5 yarım saatdan bir yenilənməlidir. Açıq dərili və ləkəyə meylli dərilərə SPF50 (günəşdən qorunmaq üçün), 4-6-cı qrup dəri tipinə malik olanlara isə SPF30 uyğun hesab edilir.

 

Quba Rüstəmova günorta saatlarında (12:00-16:00) açıq havada gəzintinin minimuma endirilməsini, geniş kənarlı papaqlardan, çətirlərdən, günəş eynəklərindən, açıq rəngli, nazik və təbii materiallı geyimlərdən istifadə olunmasını tövsiyə edib.