Andes ştamlı hantavirusa qarşı vaksin mövcud deyil. Buna səbəb yoluxma hallarının çox nadir qeydə alınması və preparatın hazırlanmasının hələlik məqsədəuyğun hesab edilməməsidir.

Aztibb.az xəbər verir ki, bu barədə RİA “Novosti”yə S.İ. Georgiyevski adına Tibb İnstitutunun mikrobiologiya, virusologiya və immunologiya kafedrasının müdiri Tatyana Satayeva məlumat verib.

Onun sözlərinə görə, Andes ştamlı hantavirus infeksiyası ilə bağlı hallar tək-tək müşahidə olunduğundan vaksin hazırlanmasına ehtiyac yaranmayıb. Mütəxəssis bildirib ki, əgər virus geniş yayılmağa başlasa, vaksin qısa müddətdə hazırlanaraq tətbiq oluna bilər.

Tatyana Satayeva vurğulayıb ki, hazırda hantavirusun pandemiya yaratmaq təhlükəsi yoxdur. Vəziyyət nəzarət altındadır və əsasən müşahidə aparılması kifayət hesab olunur.

Ekspert qeyd edib ki, kruiz gəmisində qeydə alınan yoluxma da daxil olmaqla, ayrı-ayrı hallar insanların yoluxmuş heyvanlarla təması nəticəsində baş verir. Belə situasiyalarda isə adətən lokal nəzarət tədbirləri görülür və virus əlavə şəkildə araşdırılır.