ABŞ-ın Florida ştatında həkimlər hələ doğulmamış körpənin həyatını xilas edən unikal əməliyyat həyata keçiriblər.

Aztibb.az “The Guardian” qəzetinin məlumatına istinadən yazır ki, hamiləliyin 25-ci həftəsində həkimlər dölü qismən ana bətnindən çıxararaq onun tənəffüs yollarını formalaşdırıb, daha sonra yenidən ana bətninə qaytarıblar.

Məqalədə qeyd olunur ki, “Floridada bir körpə həyatını xilas edən innovativ əməliyyatdan sonra sanki iki dəfə doğulub. Doğuşa bir neçə həftə qalmış ananın bətnindən döl qismən çıxarılıb”.

Uşaqda yuxarı tənəffüs yollarının tutulması ilə xarakterizə olunan nadir sindrom aşkarlanıb. Bu xəstəlik əksər hallarda ölümlə nəticələnir. Uğurlu tibbi müdaxilə nəticəsində Keyşera Jouber altı həftə sonra Kassian adlı oğlunu dünyaya gətirib.

Körpə dörd aydan artıq reanimasiya şöbəsində nəzarətdə saxlanılıb. Hazırda isə onun həyatı üçün təhlükə olmadığı bildirilir.