Qasıq nahiyəsində hiss olunan sancı və ya şişkinlik çox vaxt önəmsiz qəbul edilsə də, bu əlamətlər daha ciddi problemlərin göstəricisi ola bilər.

 

Bu barədə Aztibb.az-a Tədris Cərrahiyyə Klinikasının ümumi və bariatrik cərrahı, professor Elçin Abdinov məlumat verib.

 

Onun sözlərinə görə, xüsusilə əyilərkən, öskürərkən və ya ağır yük qaldırarkən qasıq nahiyəsində ağrının və şişkinliyin artması diqqətə alınmalı vacib siqnallardandır. Bəzi hallarda bu narahatlıq uzun müddət oturmağı belə çətinləşdirir.

 

“Elə hallar olur ki, pasiyentlər ağrını və şişkinliyi uzun müddət gözardı edir. Halbuki bu vəziyyət zamanla ağırlaşaraq təcili cərrahi müdaxilə tələb edən mərhələyə keçə bilər. Qasıq yırtığı zamanı bağırsaqların sıxılması bağırsaq keçməzliyi kimi ciddi fəsadlara gətirib çıxara bilər”, – deyə E.Abidinov qeyd edib.

 

Həkim vurğulayıb ki, müasir tibbi texnologiyalar sayəsində qasıq yırtığı əməliyyatları minimal invaziv üsullarla icra olunur, bu da xəstələrin daha tez sağalmasına və əməliyyatdan sonra izlərin minimum olmasına imkan yaradır.

 

Mütəxəssis əlavə edib ki, qasıq yırtığı əməliyyatı vaxtında icra edildikdə həm ağrılar aradan qalxır, həm də gələcəkdə yarana biləcək ağırlaşmaların qarşısı alınır.

 

Sonda qeyd olunub ki, qasıq nahiyəsində hər hansı ağrı və ya şişkinlik müşahidə olunduqda gecikmədən həkimə müraciət etmək vacibdir.