ATU-nun Tədris Cərrahiyyə Klinikasının ümumi və bariatrik cərrahı, t.ü.f.d. Könül Sarıyeva bariatrik əməliyyatların metabolik xəstəliklərə təsiri ilə bağlı Aztibb.az-a məlumat verib.

Onun sözlərinə görə, bariatrik cərrahiyyə əməliyyatından sonra 2-ci tip şəkərli diabetin gedişatında əhəmiyyətli dərəcədə yaxşılaşma müşahidə olunur. Qeyd edilir ki, əməliyyatdan sonra qısa müddət ərzində qanda şəkərin səviyyəsi sürətlə normallaşır.

Mütəxəssis bildirib ki, aparılan müşahidələrə əsasən, 2-ci tip şəkərli diabet xəstələrinin təxminən 77 faizi bariatrik əməliyyatdan sonra diabet əleyhinə dərman qəbulunu dayandırır.
K.Sarıyeva vurğulayıb ki, müsbət dəyişikliklər digər yanaşı xəstəliklərdə də özünü göstərir. Belə ki, arterial hipertenziyada 66 faiz, hiperlipidemiyada 83 faiz, yuxu apnoesində isə 88 faiz yaxşılaşma qeydə alınır.

Sonda qeyd olunub ki, bariatrik cərrahiyyə yalnız çəki azalmasına deyil, eyni zamanda metabolik xəstəliklərin idarə olunmasına da ciddi töhfə verir.