Dizenteriya – bağırsaq infeksiyası olub əsasən ishal, qarın ağrısı və bəzən qanlı nəcis ilə müşayiət olunan yoluxucu xəstəlikdir. Bu xəstəlik adətən bakteriyalar və ya parazitlər tərəfindən törədilir və əsasən çirklənmiş su və qida vasitəsilə yayılır.

Aztibb.az-ın məlumatına görə, profilaktik tədbirlər dizenteriya xəstəliyinə yoluxma riskini əhəmiyyətli dərəcədə azalda bilər.

Xəstəliyin inkubasiya dövrü 3 gündür. Ancaq 6-7 günə qədər də uzana bilər. Kəskin əlamətləri meydana çıxmazdan öncə xəstədə ümumi zəiflik, halsızlıq, iştahanın itməsi baş verir. Temperatur yüksəlir, qarın ağrıları və duru nəcis şəklində ishal əmələ gəlir. Zaman keçdikcə ishalın sayı gün ərzində 10-120 dəfəyə qədər arta bilir. Buna səbəb isə yoğun bağırsağın aşağı hissəsində spazmaların olması və xəstədə nəcis ifraz etməyə yalançı meyllilik yaratmasıdır. İshalda nəcis miqdarı azalaraq öz formasını itirir, əsasən qan qarışmış və bəzən isə irindən ibarət olur.