Alimlər qocalmanı yavaşlatmağın yeni yolunu araşdırırlar.

Aztibb.az-ın məlumatına görə, “Nature Aging” jurnalında dərc olunan tədqiqata görə, kalori qəbulunun azaldılması immun sisteminə müsbət təsir göstərə və yaşlanma prosesini ləngidə bilər.

ABŞ Yel Universitetinin alimləri iki il davam edən araşdırmada müəyyən ediblər ki, insanlar gündəlik kalorini təxminən 11-14 faiz azaltdıqda, sağlamlıqlarına zərər vermədən immun müdafiələri güclənir. Maraqlıdır ki, iştirakçılar bu müddətdə ciddi məhrumiyyət hiss etməyiblər.

Tədqiqat zamanı alimlər 7 mindən çox zülalı analiz ediblər və “C3” adlı zülalın səviyyəsinin azaldığını aşkarlayıblar. Bu zülal bədəndə iltihabla əlaqəlidir və onun yüksək olması yaşlanma və müxtəlif xəstəliklərlə bağlı hesab olunur. Araşdırma göstərib ki, “C3” zülalının azalması sadəcə çəki itirmə ilə bağlı deyil, yəni kalori məhdudlaşdırılması bədənə çəki itkisindən asılı olmayan əlavə faydalar verir. Heyvanlar üzərində aparılan təcrübələr də bunu təsdiqləyib, “C3” səviyyəsi azaldıqda yaşla bağlı iltihab da azalır. Bu isə gələcəkdə qocalmanı ləngidən yeni dərmanların hazırlanmasına ümid yaradır.

Alimlərin əsas məqsədi immun sistemini zəiflətmədən, sadəcə tarazlığı qoruyaraq sağlam ömür müddətini uzatmaqdır.