Müasir dünyada informasiya bolluğu adi hala çevrilib. Belə bir dövrdə vacib məlumatları yadda saxlamaq üçün diqqəti cəmləmək xüsusi qabiliyyət tələb edir. Harvard Tibb Məktəbi və İllinoys Universitetinin mütəxəssisləri yaddaşı və konsentrasiyanı yaxşılaşdırmaq üçün yeni metod təqdim ediblər.

Aztibb.az xəbər verir ki, araşdırmalara görə, müntəzəm aerobik fiziki fəaliyyət (məsələn, sürətli yerimə, qaçış, üzgüçülük və ya velosiped sürmə) beyin funksiyalarını gücləndirir. Məlum olub ki, hərəkət zamanı beyində yaddaş və diqqətə cavabdeh olan neyron əlaqələrin yaranmasına kömək edən zülallar ifraz olunur.

Həftədə üç dəfə, 30 dəqiqəlik məşq edən iştirakçılar, 8-12 həftə ərzində düşünmə sürəti, diqqət və yaddaş üzrə testlərdə daha yaxşı nəticələr göstəriblər. Fiziki fəaliyyət beyində qan dövranını yaxşılaşdırır. Bu da beyin hüceyrələrinin oksigen və vacib qidalarla təmin olunmasına yol açır. Üstəlik, idman stresi azaldır - bu isə yaddaşın əsas düşmənidir.