Bəzi uşaqlarda peyvəndləmədən sonra yüngül qızdırma, narahatlıq və peyvəndin vurulduğu nahiyədə qızartı, şişkinlik və yüngül ağrı müşahidə oluna bilər. Belə reaksiyalar sizi narahat etməməlidir, çünki onlar normal hesab edilir və tez bir zamanda keçib gedir. Peyvənd vurulduqdan sonra ciddi yan təsirlər olduqca nadir hallarda baş verir. Əgər uşaqda sizi narahat edən hər hansı reaksiya olarsa, həkiminizə müraciət edin.

 

Aztibb.az xəbər verir ki, bu barədə TƏBİB-in feysbuk səhifəsində maarifləndirici məlumat paylaşılıb.

 

Qeyd olunub ki, peyvəndlər hər hansı dərman preparatı kimi bəzi yan təsirlərin yaranmasına səbəb ola bilər. Bu normal haldır və övladınız üçün təhlükəli deyil.

 

Peyvənd vurulduqdan sonra ən çox rast gəlinən yan təsirlərə inyeksiya yerində ağrı və ya yüngül qızdırma daxildir. Bu əlamətlər adətən bir neçə gün davam edir və sadə müalicə ilə keçir. Məsələn, əgər uşaq peyvənd vurulan qolunda narahatlıq hiss edirsə, inyeksiya yerinə təmiz, sərin və nəm dəsmal yerləşdirmək, eləcə də qolu ehtiyatla hərəkət etdirmək lazımdır.

 

Uşaqlarda qızdırma qalxarsa, ona bol maye vermək və yüngül geyindirmək lazımdır. Eyni zamanda nadir hallarda olsa belə ciddi reaksiyalar müşahidə oluna bilər ki, bu zaman mütləq həkim ilə əlaqə saxlamalısınız.