Təl-Əviv Universitetinin mütəxəssisləri iddia edirlər ki, heyvanlar bitkilərin əlverişsiz şəraitə cavab olaraq çıxardığı səsləri eşidə bilirlər. Onlar müəyyən ediblər ki, dişi güvələr stres altında olan - məsələn, susuz qalan və bu zaman xarakterik səslər çıxaran pomidor kollarına yumurta qoymaqdan çəkinirlər.   

Aztibb.az-ın məlumatına görə, həşəratların məhz səslərə reaksiya verdiyinə əmin olmaq üçün alimlər vizual faktorlara nəzarət etməklə bir sıra laboratoriya təcrübələri aparıblar.

Professor Yosi Yovelin dediyi kimi, heyvanın bitkilərdən gələn səslərə reaksiyası qeydə alınmış ilk davranışıdır. Onun sözlərinə görə, əldə edilən məlumatlar ehtimal etməyə əsas verir ki, heyvanlar bu informasiya əsasında bitkini tozlandırmaq, onu yemək və ya sığınacaq kimi istifadə etməyə qərar verirlər. Növbəti mərhələdə komanda bitkilərin öz aralarında "danışa" bilib-bilmədiyini araşdırmağı planlaşdırır - məsələn, quraqlıq barədə xəbərdar etmək və rütubətə qənaət üçün mexanizmi işə salmaq. Xatırladaq ki, 2023-cü ildə tədqiqatçılar bitkilərin zədələndikdə və ya susuz qaldıqda səs çıxardığını aşkar etmişdilər. O zaman aydınlaşdırmışdılar ki, söhbət adi mənada başa düşülən hisslərdən deyil, xarici mühitin dəyişməsinə fiziki reaksiyadan gedir.