Böyük Britaniyada həkimlər genetik xəstəliklərin nəsildən-nəslə ötürülməsinin qarşısını almaq məqsədilə üç nəfərin DNT-sindən istifadə etməklə “in vitro” mayalanma yolu ilə embrionlar yaradıb.

Aztibb.az medimagazin.com.tr-yə istinadla xəbər verir ki, bu yeni texnologiya nəticəsində səkkiz sağlam körpə dünyaya gəlib. Onlardan dördü oğlan, dördü isə qızdır. Körpələr yeddi fərqli qadından doğulub və risk daşıdıqları genetik xəstəliklərin heç bir əlaməti onlarda müşahidə olunmayıb.

Proseduru keçən anaların mitoxondriyalarında genetik mutasiyalar olduğu üçün övladlarına ağır xəstəliklər ötürmək ehtimalı yüksək idi. Bu səbəbdən də mütəxəssislər yeni texnologiya ilə onların sağlam övlad dünyaya gətirməsini təmin ediblər.

Qeyd edək ki, mitoxondriya bədəndə enerji istehsal edən hüceyrələrdir və onların mutasiyası nevroloji pozuntular, əzələ zəifliyi və hətta erkən ölüm kimi ciddi xəstəliklərə səbəb ola bilər.

Dünya tibb ictimaiyyəti uzun müddətdir bu doğuşların nəticələrini gözləyirdi. Böyük Britaniya bu üsulu qanuniləşdirən ilk ölkə oldu. Məlumata görə, hazırda daha bir hamiləlik də davam edir və nəticələrin uğurlu olacağı gözlənilir.