Polidaktiliya – körpələrdə doğuş zamanı əlavə barmaq olması ilə xarakterizə olunan anadangəlmə bir qüsurdur. Ən çox əllərdə, bəzən də ayaqlarda müşahidə olunur. Barmaq tam formalaşmış sümük və oynaqdan ibarət ola bilər, yaxud sadəcə dəri çıxıntısı şəklində görünə bilər.

 

Bu barədə Aztibb.az-a Ə.D.Məlikov adına Binəqədi Tibb Mərkəzinin uşaq cərrahı Xəlil Aslanov məlumat verib.

 

Həkim polidaktiliyanın əksər hallarda genetik faktorlarla bağlı olduğunu bildirib. Bildirilib ki, bu qüsur bəzən müəyyən sindromların tərkib hissəsi ola bilər. Hamiləlik dövründə təsadüfi inkişaf qüsuru kimi də yarana bilər.

 

Polidaktiliyanın müalicəsindən bəhs edən Xəlil Aslanov qeyd edib ki, sadə dəri çıxıntıları adətən ilk aylarda kəsilir. Sümük və oynaq olan əlavə barmaqlar isə cərrahi yolla, adətən 6-12 ay arası çıxarılır.

 

Onun sözlərinə görə, məqsəd həm anatomik, həm də estetik baxımdan əl - ayağın normal görünüşünü təmin etməkdir.

 

"Polidaktiliya çox vaxt ciddi təhlükə yaratmasa da, erkən müdaxilə uşağın gələcək həyat keyfiyyəti üçün çox önəmlidir.

Uşağınızda bu cür əlavə barmaq varsa, mütləq uşaq cərrahına müraciət edin", - deyə həkim bildirib.