Yapon tədqiqatçılarının yeni tədqiqatı piylənmə və diabetin müalicəsinə yanaşmanı kökündən dəyişə bilər.

Aztibb.az-ın www.eurekalert.org-a istinadla xəbərinə görə, Osaka Universitetinin alimləri arıqlamaq üçün məşhur dərmanların müntəzəm inyeksiyası əvəzinə birdəfəlik genetik müdaxilə təklif ediblər, bundan sonra orqanizm özü lazımi maddəni istehsal etməyə başlayır.

Tədqiqatın nəticələri "Communications Medicine" jurnalında dərc olunub.

Tədqiqatçılar xəstəliyə səbəb olan mutasiyaları düzəltmək əvəzinə (gen terapiyası adətən olduğu kimi) siçanların qaraciyər hüceyrələrinə iştahı azaldan və maddələr mübadiləsini yaxşılaşdıran GLP-1 hormonunun analoqu olan eksenatidi kodlayan yeni gen yerləşdiriblər. 

Müalicə olunan siçanlarda qanda ekzenatidin səviyyəsi uzun müddət sabit qalıb və heyvanlar özləri daha az yeyib, daha yavaş çəki alıb və qlükozanı daha yaxşı mənimsəyiblər. Heç bir yan təsir qeydə alınmayıb.

Beləliklə, yeni yanaşma gen terapiyası və bioloji dərmanların faydalarını birləşdirib.

Tədqiqat rəhbəri Keyiçiro Sudzuki bildirib ki, orqanizmə gen daxil etmək mümkündür və hüceyrələr özləri bir neçə ay ərzində daimi inyeksiyalara ehtiyac olmadan lazımi dərmanı istehsal etməyə başlayacaqlar.

Müəlliflər qeyd ediblər ki, bu üsul təkcə piylənmənin deyil, həm də spesifik genetik mutasiyalarla əlaqəli olmayan digər xroniki xəstəliklərin, məsələn, 2-ci tip diabet və iltihablı xəstəliklərin müalicəsi üçün uyğun ola bilər.

Metodun effektivliyi sonrakı tədqiqatlarda təsdiq olunarsa, bu, xəstələrin həyat keyfiyyətini yaxşılaşdıracaq və müntəzəm inyeksiya ehtiyacını aradan qaldıracaq yeni dərmanların hazırlanması üçün əsas ola bilər.