Dünya alimləri ətirlərdən çox istifadə edənlər və ya tez-tez bu qoxulara məruz qalan insanların sağlamlıqlarının təhlükədə olduğunu bildiriblər. Mütəxəssislər söyləyirlər ki, parfümlərin tərkibindəki bəzi kimyəvi maddələr həm sinir, həm də tənəffüs sisteminə ciddi  zərər verə bilər.

Aztibb.az xəbər verir ki, Harvard Tibb Məktəbinin apardığı araşdırmalara əsasən, sintetik ətirlərdəki uçucu birləşmələr beynin funksiyalarını zəiflədir, yaddaş problemləri və konsentrasiya çətinliklərinə səbəb olur. Bu maddələr eyni zamanda xroniki yorğunluq və baş ağrılarına yol açır. Parfüm qoxuları  eyni zamanda bronxial qıcıqlanma, astma tutmaları problemlərinə gətirib çıxara bilər. Bundan əlavə, mütəxəssislər bəzi ətirlərdə istifadə olunan ftalat və sintetik müşk kimi maddələrin insanın hormonal balansını poza biləcəyini qeyd ediblər. Bu isə reproduktiv sağlamlığa mənfi təsir göstərir. Onlar bildiriblər ki, xüsusilə uşaqlar və körpələr üçün bu risk daha yüksəkdir. Belə ki, güclü qoxulu ətirlər uşaqlarda yuxusuzluq, narahatlıq və hətta nəfəs tutmaları kimi hallar törədə bilər. Alimlər insanları bu maddələrə qarşı daha diqqətli olmağa, ətir istifadəsində təbii və dermatoloji cəhətdən test edilmiş məhsullara üstünlük verməyə çağırırlar.