Beynimiz bədənimizin ən sirli orqanıdır. Dünya alimləri uzun illərdir bu orqanın sistematik fəaliyyəti ilə əlaqədar araşdırmalar aparsalar da, onun necə işlədiyini tam olaraq öyrənə bilməyiblər. Amma hər dəfəsində maraqlı faktlar aşkarlayıblar. Bu dəfə isə Massaçusets Universitetinin alimləri beynin ultra zəif foton şüalanması şəklində işıq saçdığını müəyyən ediblər.

Aztibb.az futurism.com-a istinadla  xəbər verir ki, "Current Biology" jurnalında dərc edilən araşdırmanın nəticələri göstərib ki, beynin parlaması əslində metabolik proseslərin yan təsiri kimi baş verir. Alimlərin fikrincə, bu şüalanma bəzi beyin xəstəliklərinin erkən mərhələdə aşkarlanmasına kömək edəcək. Belə ki, fotoensefaloqrafiya adlı yeni görüntüləmə texnologiyası bu siqnalları MRT (Maqnit Rezonans Tomoqrafiya) ilə birlikdə diaqnostik vasitə kimi istifadə edə bilər.